لو حد سألنى : تابعتى ايه من مسلسلات رمضان ؟؟؟؟؟؟
هقوله : ولا مسلسل
مش لأنى مقاطعه المسلسلات أو لانى شايفه ان المسلسلات حرام
بس لأنى شايفه ان ولا مسلسل منهم يستحق المتابعه
لأنى ببساطه حاسه وكأن كل مسلسل فيهم زى الدرس اللى ذاكرته ألف مره
والمطلوب منى انى اذاكره للمره الألف وواحد
لاء وأكتشف فيه معلومات جديده كمان
ولأنى كمان شايفه ان المسلسلات دى ماتنفعش غير لواحده عقلها قد عقل ياره بنت عمى اللى لسه مادخلتش المدرسه
ممكن بكل سهوله لو حكيتلى على أول حلقه فى المسلسل
أقدر أخمن لك نهايته
والغريب انهم بيقولوا انهم بيعبروا عن الواقع
الواقع فى قاموسهم يعنى مشكله تقابل البطل ويقعدوا يحلوا فيها طول المسلسل وفى أخر حلقه ينتصر الحق
بالله عليكم فيه فى الزمن ده حق بينتصر ؟
بالله عليكم فيه كام واحد فى البلد دى عاش مظلوم وحقه مهضوم ومات من حسرته لأن حقه مارجعش ؟
وبالله عليكم فيه كام مجرم بيسرق وينهب ويظلم وفى الأخر ولا كأنه عمل حاجه ؟
ده حتى لما الواحد يفتكر ان الزمن خلاص هينصفه وهيظهر الحق ويزهق الباطل
ويروح للعداله ويرفع قضيه
للأسف اللى بيكمل القضيه أحفاده من بعده وممكن الموضوع يخلص بدرى بدرى
وياخد المحامى قرشين ويبيع القضيه وصاحب القضيه
طب بالله عليكم ممكن فى زمانا ده ابن وزير او حتى ابن رجل اعمال يدخل السجن ؟
من نهايته المسلسلات دى كانت هتبقى ناجحه وناجحه قوى وهصدقها بس هناك
فى المدينه الفاضله عند أفلاطون
مش فى سنة 2008 وفى عهد حبيب الكل
رمضان كريم وكل سنه وانتم طيبين ونتمنى لكم مشاهده طيبه مع أواخر حلقات مسلسلات الواقع
15 التعليقات:
يا بنتى والله المسلسلات السنه دى واللى قبلها وكل سنه شئ مقرف جدا مثير للأشمئزاز واحداث مختلقه مصطنعه ولا ليها اى معنى ولا طعم وحبكات لا دخل ليها لا بالدرما ولا حتى بالقضاء والقدر منتهى العبثيه والتفاهه ولعب العيال . انا كنت كاتبه بوست برضه عن كميه الهبل والعته اللى بيحشو دماغنا بيه بس على المدونه التانيه وكنت قربت اولع فى نفسى من اخواتى اللى خلو المسلسلات تدخل فى بعض ويقعدونى منيش عارفه بتفرج على ايه
تصدقى عندك حق
مفيش مسلسل حلو وكلهم زى مسلسل من العبيط الى ضرب النار على هند بنت علام ؟
والله فعلا معاكى الف حق
حاجه مالهاش اى طعم وكلها شبه بعض
سلام عليكم
اول زيارة ليا وعجبتنى مدونتك اوى
بس والله عندك حق
انا برده مش مبتابع ولا مسلسل يمكن السنة اللى فاتت قضيية راى عام كانت جديدة لكن السنة دى ولا مسلسل عدل
تقبلى مرورى
سلام
الدااااااااااااااااااالى تستحق المتابعة يا دودو
تستحق المتابعة عن جدارة .. اولا مافيش مثالية خنيقة .. ثانيا في منطقية وفي ذكاء وصدقينى مستحيل تتوقعى ايه هيحصل كمان خمس دقايق
بالنسبة لكلامك بقى انا معترضة ع حاجة يا دودو .. (( في حق بينتصر في الزمن دا )) ايوة يا دودو في والله العظيم في ممكن يكون النصر بعيييييد ومش بنلحق نشوفه .. وممكن يكون النصر صغير مش واخدين بالنا منه لكن صدقينى الحق بينتصر اوعى تفقدي ايمانك بكده ابداً والا كلنا نروح نقف بقى جنب الباطل علشان هو اللى بينتصر .. ربنا موجود يا دودو وعلشان كده بس الصح هو اللى بينتصر ف النهاية
احسن حاجة عملتيها انك طنشتى مسلسلات رمضان
بس يا ريت تكونى استفدتى من رمضان بطريقة احسن
ان شاء الله
احسن حاجه عملتيها
الاحسن انك تبطلى تتفرجى ع التلفزيون خالص
تصدقى فعلاً ان انا مش بعرف المسلسلات من بعضها
كل حاجه بتدخل فى بعضها عندك حق فى كل كلمه قلتيها
ازيك يامحمد ؟
تعرف سواء مسلسلات او افلام
تلاقى المسلسل او الفيلم مايبقاش مسلسل او فيلم
الا بالضرب والقتل وكانك عايش فى مافيا
فين مشاكل المجتمع الحقيقيه بقى ؟
ما اعرفش
blue_wave
الحمد لله انى ماتبعتش اى حاجه لانى لو تابعت
كان هيجيلى الضغط والسكر وكل حاجه
الحمد لله
استاذ حسام
انا سعيده بزيارتك
واتمنى ان الزياره تتكرر وماتبقاش اخر زياره
والحمد لله انك ماتبعتش حاجه
ازيك ياساروره
وحشتينى خالص
بصى ياسيتى الدالى نفس نمط المسلسلات اللى بكرهها
اللى هى كلها اكشن وتحس انك عايش فى مافيا
يعنى مش بتعبر عن مشاكل الناس الحقيقيه
اما بالنسبه للحق
فانا مؤمنه ان الحق بينتصر فى الاخر لان فى ربنا
لكن مش بالصوره اللى فى المسلسلات
لان ممكن اوى الانسان يموت وهو حقه مارجعش
لكن ربنا اكيد منتقم جبار
غير معروف
شكراً جداً على الزياره
وشكراً على المعلومات اللى زكرتها
وباذن الله هشوف الرابط
raspoutine
الحمد لله
الواحد لو كان اتفرج عليها كان زمانه ضيع الايام الجميله دى هباء
ده غير القرف والزهق والملل اللى كان هيحصل لو اتفرجت عليها
ازيك ياكفراوى
انت بتقول فيها
انا مش بتفرج عليه الا كل فين وفين
إرسال تعليق