اشياء صغيره قد تحدث لك فى اليوم
وتجعلك حزين طواله
أشياء صغيره قد تجعلك تبكى وتبكى بغزاره
وربما إذا صارحت بها غيرك
لنظر إليك وكأنك جننت
أشياء لا تستطع أن تصارح بها سوى نفسك
أشياء صغيره ...
هكذا هى فى نظرهم
انما فى نظرك أنت
فهى أكبر وأكبر بكثير
فقد تترك لك احساس مؤلم وجرح
وأصعب ما فى هذه الأشياء
أنها صغيره فى نظر من فعلها وجرحك
والأصعب من هذا
أنك لا تستطع ان تلومه
لأنه ببساطه سيسخر منك
وليتنى الأن أستطيع التخلص من هذه الأشياء
التى فى نظرى كبيره
ولكنها عند الأخرين
ليست صغيره ....بل تافهه
فها هى الأشياء الصغيره
وهاهو صنيعها بنا
فهل من منفذ ؟؟
24 التعليقات:
المشكلة فى انهم شايفينها صغيرة انهم مش بيفكروا يتعذروا عنها ، وكمان بيشوفوا انك بتحبكيها وبتزعلى من غير سبب .. بس تعرفى احيانا بزعل الناس من غير ما اقصد لأنى ببقى مش متخيلة انهم فهموا كلامى بالطريقة دى بس بحاول اسألهم زعلوا منى فى ايه واعتذر حتى لو كان الموضوع من وجهة نظرى ما يستاهلش ..
طب و بعدين الحاجات الصغيرةدى
هتفضل موجودة لحد ما تكبر جوانا
و العمل اية ؟
ازيك ياسارورتى
عامل ايه ياجميل ؟
ياريت الناس كلها تعمل ذى ما بتعملى
ماكنش هيبقى فى مشاكل بينا
تحياتى لاحلى ساروره
ازيك ياكفراوى
بجد شكراً على نصيحتك دى
لانى لو فعلاً ما عتبتش على الحاجات الصغيره هتكبر
وممكن اتغير من ناحية ناس هم اصلاً غالين عندى
تحياتى
عارفه الناس مش بتصدق ان عندى 22 سنه من حاجتين هما شكلى وطريقتى الى ذى الاطفال لكن انا بحب كده لان اجمل حاجه فى الدنيا انك تفضل طفل تعمل الى انت عايزه
ههههههههههه
صغيره ولكن
ناقصات عقل ودين
اللى هو احنا يادودو
الحاجات الصغيره دى مش بتنيمنى
سلاااااااااااااااام
لا مش صغيره ابدا اى حد تعبان من حاجه لازم كلنا نحترمها ونديها حجمها لأأن كل واحد شايف مشكلته مافيش اكبر منها
وبيتفه من مشاكل الاخرين المفروض كلنا نعذر بعض ونقدر بعض ونحس اكتر ببعض
مافيش حاجة صغيرة فى نظر صاحبها وكل انسان عندة مشاكلة ونظرة كل انسان للحاجة اللى بضايقة وطريقة حلة لمشكلتة بتختلف من انسان للتانى عشان مافيش حد اصلا شبة التانى عشان كدة مافيش حد بيفهم مشاكل التانى كتير وانا ساعات زيك برضة بضايق من حاجات صغيرة وبيقولوا عليا تافهه وحساسة زيادة عن اللزوم بس اعمل اية انا كدة
بمنتهى البساطه قلتي اللي انا عاوزه اقوله..
عارفه من كتر م اعانيت من الموضوع ده بقيت اعمل ايه؟!! ما بقتش افكر حتى مجرد التفكير اني احكي لاي حد.. و ارسم على وشي ابتسامه طول النهار عشان محدش يشوفني مكشره و يقولي مالك و اضطر اقول مالي و ارجع ازعل من رد الفعل..
وليه تتخلصى من الحاجات دى
مهما كانت أيه فهى أنتى و مينفعش طبعا ً تتخلصى من نفسك
صح ولا ايه
أنما ممكن تجددى فيها و هنا تكونى أنتى المنقذ
سلام يا دودو
ياه ده الواحد اتبهدل من الحاجات الصغيره دى او الى فى نظر الى عملها صغيره
وتعد تكبر وتكبر وتبقى كلاكيع وعقد
اختلاف شخصيات الناس واستعدادهم يخلق بعض الاختلاف فى وجهات النظر
مثلا ممكن اكون انا انسان حساس فيفرق معايا موقف حد عمله ويكون اللى قدامى مش مستوعب زعلى لأنه بالنسبة لشخصيته الموضوع عادى .. عشان كده لازم نفهم اللى قدامنا كويس
موضوع جيد جدا
اتمنى زيارة مدونتى
estraha.blogspot.com
حقا أشياء صغيرة...ولكنها كبيييييييييييرةioa
ازيك يامحمد
بجد انا معاك جداً ان الانسان يفضل على طول طفل وانا على فكره كل اللى يعرفنى
بيقولى اخرك تانيه اعدادى
تحياتى
سلاااااااااام
ازيك يامنايا
والله الحكايه مش حكاية العقل ولا حكاية الدين
حكاية ان الواحد ممكن يجرحك بكلام من غير ما يحس
او تصرفات هو استحاله يجى فى باله انها تزعل
ليكى يابنتى والله حق ماتناميش
اصلى زيك
سلام يا احلى منايا
ازيك ياداليا
منور المدونه ياجميل
لكن انت اتكلمتى عن المفروض ومش كل الناس بتمشى بالمفروض
قليل قوى اللى بيحترم مشاكل غيره ولو فى نظره تافهه
بس رأيك طبعاً مفيش اختلاف انه الصح
انا معاك ياعسل فى كل كلمه
وياريت زيارتك تتكرر
سلام
facemoon
شكراً جداً لزيارتك مدونتى
تعرفى المشكله بقى انك تصارحى اللى قدامك وتلاقيه مش مقدر اى حاجه
بجد الحاجات دى بتزعلنى قوى
بس ذى ما انت قلتى
انا كده
سلام ياقمر
ازيك ياهاجر
مدونتى منوره بيكى
تعرفى فكرتينى بمقولة
( الشكوى لغير الله مذله )
اهو ده ينطبق على حالتنا
لما تشتكى لحد ويقولك ايه التفاهه دى
يالا معلش هنعمل ايه
بس لو حسينا ان الحاجات دى ممكن تبعدنا عن الناس دى من كتر ما احنا خبينا زعلنا عنهم
لازم طبعاً نحكى عشان مانسيبش الفجوه تكبر
تحياتى ياجميل
تمرايا
ازيك ياجميل
عجبتنى قوى كلمة الحاجات دى انتى
فعلاً الواحد ما يعرفش يتخلص من نفسه
بس تعرفى انا قررت انى ماخبيش اى حاجه
حتى لو كانت فى نظر غيرى صغيره
لأنها اكيد ممكن تكبر جوايا وساعتها ممكن ابعد عن ناس هم اصلاً غالين قوى عندى
تحياتى لأحلى تمرايا
ازيك ياعمو احمد
ده انت شكلك معبى ياراجل
بس المهم انك لازم تقول على اللى مضايقك
عشان ما يبقاش كلاكيع ذى ما قلت
المدونه نورت بيك
تحياتى
استراحة محمد
شاكره جداً تعليقك
لأن فعلاً الواحد لازم يفهم اللى قدامه كويس
بس حتى لو مش فاهم ايه اللى زعله
يحاول على قد مايقدر مايسخرش منه
تحياتى لتعليقك ومرورك
وده شرف ليا انى ازور مدونتك
دواير
طب نعمل ايه ما احنا كده
ما ينفعش كل الناس تقول على حاجه واحده حلوه
كلنا مختلفين
عشان كده قليل وجهات نظرنا تتلاقى
بس المفروض نحترم مشاعر بعض حتى لو مش حاسين بيها
تحياتى
المشكلة ان محدش بيحس بحد...لو الناس توصل انها تقدر تحط نفسها فى موقف اللى ادامه بتفكيره هو..او على الاقل يحترم احاسيسه و يسمعله و بس
تحياتى
شكراً على زيارتك مدونتى يادينا
بس تعرفى اهم حاجه اتعلمتها انى اعامل الناس زى ما احب يعاملونى
بس للأسف مش كتير ماشين بالمبدأ ده
تحياتى
إرسال تعليق