مسلسلات الواقع

لو حد سألنى : تابعتى ايه من مسلسلات رمضان ؟؟؟؟؟؟

هقوله : ولا مسلسل

مش لأنى مقاطعه المسلسلات أو لانى شايفه ان المسلسلات حرام

بس لأنى شايفه ان ولا مسلسل منهم يستحق المتابعه

لأنى ببساطه حاسه وكأن كل مسلسل فيهم زى الدرس اللى ذاكرته ألف مره

والمطلوب منى انى اذاكره للمره الألف وواحد

لاء وأكتشف فيه معلومات جديده كمان

ولأنى كمان شايفه ان المسلسلات دى ماتنفعش غير لواحده عقلها قد عقل ياره بنت عمى اللى لسه مادخلتش المدرسه

ممكن بكل سهوله لو حكيتلى على أول حلقه فى المسلسل

أقدر أخمن لك نهايته

والغريب انهم بيقولوا انهم بيعبروا عن الواقع

الواقع فى قاموسهم يعنى مشكله تقابل البطل ويقعدوا يحلوا فيها طول المسلسل وفى أخر حلقه ينتصر الحق

بالله عليكم فيه فى الزمن ده حق بينتصر ؟

بالله عليكم فيه كام واحد فى البلد دى عاش مظلوم وحقه مهضوم ومات من حسرته لأن حقه مارجعش ؟

وبالله عليكم فيه كام مجرم بيسرق وينهب ويظلم وفى الأخر ولا كأنه عمل حاجه ؟

ده حتى لما الواحد يفتكر ان الزمن خلاص هينصفه وهيظهر الحق ويزهق الباطل

ويروح للعداله ويرفع قضيه

للأسف اللى بيكمل القضيه أحفاده من بعده وممكن الموضوع يخلص بدرى بدرى

وياخد المحامى قرشين ويبيع القضيه وصاحب القضيه

طب بالله عليكم ممكن فى زمانا ده ابن وزير او حتى ابن رجل اعمال يدخل السجن ؟

من نهايته المسلسلات دى كانت هتبقى ناجحه وناجحه قوى وهصدقها بس هناك

فى المدينه الفاضله عند أفلاطون

مش فى سنة 2008 وفى عهد حبيب الكل

رمضان كريم وكل سنه وانتم طيبين ونتمنى لكم مشاهده طيبه مع أواخر حلقات مسلسلات الواقع

ملائــــــــكـة الـــــــــــــرحمــــــــــه

" يابن أدم افعل ما شئت فكما تدين تدان "

هذ الحديث اردده دائماً حينما اتذكر ماحدث لفؤاد الشرقاوى

من فؤاد الشرقاوى ؟ وماذا حدث له ؟

فؤاد الشرقاوى رجل بلغ من العمر ثلاثين عاماً وعاجز تماماً عن الحركه لأنه ولد بمرض شلل الأطفال

ورجل فى مثل حالته هذه لا يجد الا بالكاد قوت يومه

ذات يوم اصيب فؤاد بتعب شديد وبعد عمل التحاليل اكتشف ان عنده حصوتين على الكلى ولابد من اجراء العمليه له

ونظراً لحالته التى يرثى لها أخذ قرار من وزارة الصحه بإجراء العمليه على نفقة الدوله

ذهب الى المستشفى وأعطى هذ القرار لرئيس قسم الجراحات ( محمد خطاب ) لإجراء العمليه له

وكان رد محمد خطاب عليه " ما بعملش عمليات لحد " !!!!!!!

فتساءل الشرقاوى ومن سيجرى لى هذه العمليه ؟

فكانت الاجابه " مااعرفش انا مابعملش عمليات لحد "

خرج فؤاد يسأل الاطباء فى المستشفى ماذا بوسعه ان يفعل وهو يتألم كل هذا الألم ؟

فنصحه الأطباء بان يحاول مرة ثانيه معه لأنه رئيس قسم الجراحات وان لم يقوم بإجراء العمليه له

فلن يستطع احد اجرائها له فمن منطلق منصبه ومركزه هذا لن يستطيع احد ان يحاسبه او يقف امامه

وان كان مدير المستشفى

أراد أن يحاول مرة ثانيه وعند دخوله المكتب وهو فى أشد حالات المرض وغير قادر أن يتحمل أكثر من هذا

قال له " ارحمنى انا مش قادر حرام عليك "

فكان رد ملاك الرحمه :

: انت شايفنى فاتحها مصلحة شئون اجتماعيه ..... انت واحد بتصلبط ومش محتاج عمليه ...... اطلع بره "

أخذ يبكى ويتوسل اليه ويستغيث به

فقال له محمد خطاب " خذ هذا العنوان واذهب الى هذا الطبيب وسيقوم لك بإجراء العمليه "

بالفعل ذهب الشرقاوى وقد ظن ان الله قد أنزل رحمته فى قلب محمد خطاب

وهناك أكد له الموجودون أن هذا الطبيب لا يأتى منذ فتره

فما كان منه الا ان اتصل بمحمد خطاب وقص له ما حدث

فضحك خطاب بسخريه قائلاً : " ايه ده ياراجل انت روحت .... أنا كنت بهزر معاك "

" أنا كـــــــنت بــــــــهزررررررر معاااااااك "

الراجل عايز يهزر لاء ومش مع أى حد

مع واحد مشلول ـ الله العالم لما بيسافر بيتعب ازاى ـ مريض .....عاجز ..... فقير

حسبى الله ونعم الوكيل ولكن له الله

فقد أنزل الله الرحمه فى قلب احد الإدارين فقام بتحويله الى مستشفى اخرى

وبالفعل وجد هناك نقيض محمد خطاب ... وجد قلب رحيم وملاك رحمه بالفعل

أجرى له العمليه بدون مقابل ....... بدون استهزاء ...... بدون سخريه

وانتهى الى هنا هذا الموقف ولكنه لم ينتهى الى الأبد

فسيتكرر مع اختلاف الأبطال

سنجد يوماً ما محمد خطاب فى هذا المكان عاجز عن شفاءه أحد بل قادرين على شفاءه وغير راغبين

ولن يفيده حينها مركزه او سلطته

أقول لكل محمد خطاب ..... لكل مسئول وضعه الله فى مكان لمساعدة المحتاجين

فأخذ من مكانه ومركزهوسيله للسخريه بهم وايذائهم وظلمهم

أقول لكل هؤلاء

" إذا دعتك قدرتك لظلم الأخرين تذكر قدرة الله عليك "

كلااااااااااااااام × كلااااااااااااااااااااااااااام

بدأت رحلة الكفاح مع التدريب وذهبت لعمل تحقيق صحفى عن التلوث البيئى فى كفر الزيات


من منطلق أن كفر الزيات هى سابع مدينه على مستوى العالم من حيث التلوث


أردت الذهاب لمجلس المدينه لأخذ أراء المسئولين عن أسباب التلوث وعن طرق علاجها


وبدأت موضوعى مع المسئول عن الشئون البيئيه فى مجلس المدينه


وبدأت أخرج أدواتى الصحفيه حتى اسجل معه


ولسه والله بطلع قاللى : لااااااااااااااااااااااااء مفيناش من تسجيل


قلت له : ليييييييييييييييه ؟ ! !


قاللى : لازم اخد اذن بالتسجيل معاكى


قلت له : وعلى اييييييييه ؟ هو ربنا خلقلى ايدين ليه


اتفضل اتكلم وانا هكتب وراك


وبدأ الحوار بينا وكان كالأتى :


حضرتك عارف ان مدينة كفر الزيات سابع مدينه على مستوى العالم


فقاطعنى بمنتهى العصبيه وقال :


مين قال كده ؟ ... ليه التهويل والتضخيم ده ؟


قلت له : دى الاحصائيات يافندم


وفوق الاحصائيات قلت لرئيس المجلس كده ما اعترضش بل بالعكس أيد كلامى


تردد لأن رئيس المجلس ده رئيسه بس رجع وقال : يقول هو حر فى كلامه


طب حضرتك شايف كفر الزيات ايه من التلوث


رد : هى مدينه صناعيه مثلها مثل أى مدينه وبها تلوث لا نستطيع انكاره وسكت وقاللى :


ثوانى عشان ما قلش كلام أحاسب عليه ويودينى فى داهيه


وطلع ورق من المكتب بتاعه


وقعد يملينى وأنا وأكتب ويملى وأنا أكتب لحد ما مليت


ومن ضمن كلامه اللى شكلهم محفظينهوله عشان يقوله


ان سبب التلوث مش ناتج عن مصانع كفر الزيات وناتج فى الاساس من مصانع محافظة البحيره


فكان سؤالى : طب ليه حضرتك بصفتك المسئول عن البيئه فى كفر الزيات والمسئول عن البيئه فى البحيره


ما تحاولوش التنسيق مع بعض والتعاون بحيث يتم انهاء التلوث او على الاقل تقليله


سكت وقاللى : سؤال صعب ده ماقدرش اجاوبك عليه


قاللى استنى كده وبص فى الورق اللى عنده لعل وعسى يلاقلى اجابه عنده ولما ملاقاش قاللى :


سؤال صعب


قلت له : ايه الصعب اللى فيه ؟ !!!!!!!


ليه حضرتك ما تطالبش بالتنسيق بين الجهات المسئوله عن البيئه فى محافظة البحيره لتقليل التلوث

قالى : نطااااااااااالب اكتبى اكتبى انا بصفتى المسئول عن شئون البيئه فى كفر الزيات اناشد المسئولين عن البيئه فى البحيره

واطالبهم بالتنسيق لانهاء التلوث

قال كلمة نطالب دى وكأنه بيقولى :

نطالب مانطالبش ليه ؟ هو حد واخد منها حاجه

يعنى انت شايفه ان حاجه من دى هتتنفذ ؟ اهو كلام ابن عم حديث

شوفتوا بقى قد ايه المسئولين بيراعوا مصلحتنا ؟

شوفتوا قد ايه هما بيتعبوا عشانا وعشان صحتنا وصحة ولادنا ؟

كل الكلام اللى قالهولى كلام انشاء بيقوله بس عشان عهما قالوله قول كده

كلام فى كلام فى كلام لكن فعل وتنفيذ وةيحاولوا يفكروا فعلاً ازاى ممكن يحلوا المشكله .... ما أعتقدش

ولو حصل وبقوا كده عمر ما مصر ما هتبقى كده

طلعت من عنده وبجد بضحك بس بضحك من همى

لأن فعلاً الناس دى مش حاسه بمعاناة الناس كل همها انها تكتب تصريحات وتدى وعود تسكت الناس بيها

وجارى انشاء مشروع وجارى عمل مصرف لانهاء التلوث وجارى وجارى وجارى

كلام فاضى بيضحكوا بيه علينا

أهم حاجه مايقولوش كلام يوديهم فى داهيه

لكن احنا ( الشعب ) نروح فى 600 داهيه

هى دى للأسف مصر ..... وهما دول للأسف المسئولين فيها

ملحوظه : ولا حرف من اللى قاله ذكرته فى التحقيق لأنى ببساطه عرفت بلاوى ومخالفات مش ماشيه خالص مع اللون الوردى بتاعه

لــــــــــــماذا ؟؟؟؟؟

لماذا عندما نتقابل يتعمد كلاً منا جرح الأخر؟

لماذا دوماً هذه الحياه مليئه بالصراعات ؟

لماذا على الرغم من اننا بشر ذات طبيعه واحده لا يسود الفهم بيننا ؟

لماذا يؤذى كلانا الاخر عن قصد او بدون قصد ؟

لما يدخل الزوج حياة زوجته ليشعرها بالنقص ؟

ولما هى دوماً تبدو غير راضيه عنه وعن حياتهما ( الا من رحم ربى ) ؟

لما المشاكل التى تحدث بين الصديق وصديقه والتى قد تؤدى لانقطاع علاقتهماوقد عاشا اجمل ذكريات حياتهما سوياً ؟

لماذا نفعل ما يغضب الاخرين مننا ونحن نعلم جيداً انهم يحبوننا ؟

لماذا ولماذا ولماذا ...................... ؟

اسئله لا أتمكن من الاجابه عليها ؟

ولكن نصيحتى لك

اذا شعرت بأن وجودك فى حياة غيرك سيؤذى مشاعره او سيجرحه للحظات

فلتبقى بعيداً عنه

حتى تصبح صوره جميله بدلاً من أن تكن حقيقه مؤلمه

خبطتين فى الراس

التاجين دول دبسنى فيهم كيمو " صاحب مدونة صوت من مصر "

وطبعاً خبطتين فى الراس توجع

شكراً جداً ياكيمو على الخبطتين اقصد التاجين ومسيرها مردوده

التاج الاول

اذكر 6 اسرار قد لا يكتشفها من يقابلك لاول مره ؟

1 / انى فى تانيه كليه ( بيقولولى اخرك 2 اعدادى )

2 / مش بعرف اطبخ

3 / انى بتلامض ( الكل مفكرنى هاديه وبعدين بيكتشفوا حقيقتى المره )

4/ بقدم حسن النيه فى التعامل لاقصى درجه مع اى حد

5/ بسيب فجوه فى اى حاجه بعملها

6 / مستهتره لحد كبير ومش بستغل نعم ربنا عليا

التاج التانى

اذكر 16 صفه عن نفسك

ياااااااااااااااااه 16 ...ده ايه الافترا ده

1 / مش فاهمه نفسى او بمعنى اصح مش عارفه اوى ايه مميزاتى وايه عيوبى

2/ مش بتنرفز بسرعه بس لما بتنرفز اجارك الله

3/ بكره القسوه لما تيجى من احن الناس عليا

4 / دموعى قريبه جداً ومن موقف صغنن ممكن تلاقى نفورة دموع

5 / تفكيرى لدرجه كبيره لا واقعى ولا منطقى

6 / ممكن فى ثانيه تلاقينى سعيده وفى ثانيه اكتئب من غير سبب

7 / اكره انى احس انى مغفله وبيضحك عليا

8 / بحب اخواتى واصحابى جداً ( احلى ما فى حياتى )

9 / بحب مجال دراستى جداً

10 / ممكن اكون حزينه وابين عكس كده تماماً

11 / بكره ان حد يكون ليه عليا جمايل

12 / مش بشيل من حد وسهلة المصالحه جداً

13 / بكره المشاكل جداً ونفسى اعيش مع ناس مسالمه

14 / مش بحب اتعلق باى حد واى حاجه لدرجه كبيره لانى واثقه ان كده كده هفارقها

ومع ذلك بتعلق بناس كتير وبضطر افارقهم وفى الاخر بنجرح

15 / بكره الكدب جدا والخيانه مووووت والظلم اطيق العمى ولا اطيقهوش

16 / ممكن اضحى باى حاجه لو هتيجى على كرامتى ولو فيها اى ذل ليا

اذكر احلام تخص ماضيك كنت هتتخلى عن ايه وحققت ايه لحد دلوقت ؟

زمااااااااااااان كان نفسى ادخل كلية هندسه بس الحمد لله انى مادخلتهاش لانى فعلاً لقيت نفسى اوووووووووووووى فى مجالى

نفسى اكون صحفيه ناجحه اغير بكتاباتى اللى مش راضيه عنه واغير سلبيات المجتمع اللى انا فيه

انى اكون سبب فى تحقيق احلام كل الناس اللى عرفتهم

انى اسيب بصمه فالدنيا دى ومبقاش زى ما دخلت زى ماخرجت

لسه لحد الان ماحققتش حاجه من دى بس بسعى

اذكر شخصين على الاقل موجودين فى حياتك وكنت تتمنى وجودهم من قبل ؟

_ انا بتفكيرى الحالى مش تفكير زمان

_ اصدقاء الكليه وبعض دكاترته ( بالتحديد دكتور نبيل طبوشه _ دكتور احمد عبد الفتاح _ دكتور ابراهيم عبد العال )

اذكر شخصين غير موجودين فى حياتك وتتمنى وجودهم مستقبلاً فى حياتك وحياة ولادك ؟

_ بيتنا القديم ....كنت اتمنى وجودى ووجود ولادى فى المكان ده لانى بحبه وبلاقى نفسى فيه

_ كنت اتمنى وجود الرسول " ص " او اى حد من الصحابه فى حياتى وحياتهم وحياتنا كلنا

اخيييييييييراً خلصت

اشهد ان لا اله الا الله

الدور على مييييييين فى التدبيس ؟

موجوده انا

بنوته لاسعه

كفراوى

تمر حنه

مدحت محمد بلوج البصيره

احمد بلوج امى

العيون لو تخون يبقى كل شىء يهون

قالت لها : لا يوجد أحد من الرجال مخلص

فأجابت : إلا هو .... فقد قال لى مراراً أنه لا يرى سواى

ضحكت بسخريه : قال لكى ؟ ! .... ومنذ متى يقولون ما يفعلون ؟

* ولكننى واثقه من حبه لى

_ واثقه من حبه لكى ... ولكن هل واثقه من ضميره ؟

* صمتت هنيهه ونظرت لها قائله :

أثق أنه لن يخوننى

فأبتسمت وقالت : تذكريننى بنفسى قديماً ... نفس الكلمات كانت تخرج منى دفاعاً عنه

ترددت الأخرى وسألتها : اذا كان حقاً ما تقولين .. فكيف لى أن أكتشف خيانته ؟

_ إن كنت تريدين فأعطينى رقم هاتفه وسأتحدث اليه امامك ولك أن تستمعى وتتأكدى من مدى اخلاصه لك

أعطتها الرقم وهى تدعو الله أن يخيب ظن صديقتها فيه

كانت ترتجف من الخوف فكانت تخشى أن يصبح كما لا تبغى

تجمدت فى مكانها حين سمعت صوته ....أخذت تهدىء من روعها حتى تستمع للحديث

وبالفعل حدث ما كانت تخشاه ... كانت صديقتها صائبه

فهو لم يبالى بمشاعرها واخذ يجارى صديقتها فى الحديث

والأسوأ من ذلك أنه أصبح يتحدث لصديقتها يومياً

انهمرت فى البكاء... كانت الصدمه قاسيه عليها

أخذت قراراً بأنها لن تتحدث له مرة ثانيه بل لابد لها أن تخرجه من حياتها

وألا تفكر به

ملأت حياتها بالعمل وكانت لا تترك فرصه للأفكار حتى لا تضعف وتحن له

مرت الأيام .... وبالفعل أخرجته

وأصبح لها شيئاً منسياً فالحب فى قاموسها يعنى الاخلاص

وذات يوم ... تقابلت مع احدى صديقاتها فأخذا يتبادلا أطراف الحديث

حتى قالت لها : لا يوجد احد من الرجال مخلص

فأجابت صديقتها : الا هو ... فقد قال لى مراراً أنه لا يرى سواى

ابتسمت وأخذت حقيبتها وهى تردد

ويلاً كل الويل لنا .... فتيات مخدوعات

السؤال بقى للشباب ( شكلى هضرب دلوقت )

هل الخيانه طبع عند الرجال ؟

لو انت مكانه ايه هيكون تصرفك ؟

عايزه اجابه بس مش اى اجابه ( اجابه بصــــــــــــــراحه )

حاميها حراميها

وحشتوووووووووونى موووووووووووووووت

بس الله يجازيها _ مهدم اللذات ومفرق الجماعات _ الامتحانات طبعاً

اللى اخدتنى من حياتى اللى بحبها

بس الحمد لله رجعت تانى لحياتى الطبيعيه بس طبعاً لازم احكى لكم عن نادره من نوادر الامتحانات

المشهد الأول

قاعده فى أمان الله فى اللجنه وكنت براجع واول مره اعملها واخلص قبل الوقت واراجع

لقيت المراقبه ابتسمت ابتسامه خفيفه مش بريئه وقالت لى : خلصتى

فقلت لها : الحمد لله بس براجع

فلقيتها بصت لى تانى وبتجر ناعم وبتقولى : طب حليتى السؤال ده ؟

قلت لها : ايوه الحمد لله

ما مرتش ثوانى الا ولقيتها جابت واحد من القسم وقعدته ورايا على طول

وقامت قايلالى : اديله السؤال ده

بجد والله كان ساعتها فوق دماغى مية علامة استفهام وهشة غبااااااااااااء كبييييييره

كنت مذبهله اووووووى

واكتر كلمه كنت برددها جوايا ( حاميها حراميها )

نفسى افهم اسمها مراقبه ازااااااااااااااى ولما هى تعمل كده الطلبه تعمل اييييييييييييييه ؟ ؟

ولانى كنت مندهشه اوى لطلبها ده وما كنتش عارفه اتصرف ازاى ولا كنت مستوعبه الموقف

ازاى مراقبه تحرض على الغش ؟؟!

فطنشت وعملت نفسى مش سامعه

المشهد التانى

المراقبه _ مع انى مستحرمه انى اطلق عليها الاسم ده _ قالت لى :

مش تديله السؤال بقى مش انت خلصتى ؟ ؟

قلت لها : اديهولوا ازاااااااااااى ؟ ؟

ردت بمنتهى البساطه : افتحى ورقتك عليه وهو هياخده

شايفين هى دى الناس ولا بلاش ....عمار يامصر

فبصت لها وبتدور فى دماغى الف فكره

أرفض لأنى ضد ان حد يقولى اعملى كذا ولأنى ضد الغش تماماً لأن

( من غشنا فليس منا )

ولا اديله السؤال يمكن يكون ده هينجحوا فعلاً

وبعدين بصيت ورايا لقيت الواد منظره يصعب على الكافر

فلأنى قلبى حونين ....فتحت الورقه واخد السؤال

بس طبعاً الانسان بطبيعته البشريه طماع ومش بيملى عينيه سؤال

فقاللى : السؤال الرابع كمان

ففتحت الورقه عشان ياخد السؤال (ماهى هيصه بقى )

فقاللى حاجه انا مش سمعتها

قلت له : بتقول اييييييه ؟ ؟

لقيت فجأه وبدون مقدمات المراقبه التانيه بتقولى :

انت يابنت بصى قدامك

طبعاً كنت واثقه ان الكلام ده مش ليا فقعدت ابص يمين وشمال اشوف مين الغشاشه دى اللى المراقبه بتزعق لها

وللأسف الحقيقه المره لقيتها انا

قلت بلاها مراجعه واخدت ورقتى وسلمتها ولسان حالى يقول :

خيراً تعمل شراً تلقى